راولپنڈی۔7دسمبر (اے پی پی):وزیراعظم عمران خان آکھیے جو نشے دے کینسر دے خلاف پورے ملک اچ تحریک چلائی ویسی تے نویں نسل کوں بچاوݨ کیتے معاشرے کوں رل تے منشیات، جرائم اتے کرپشن نال لڑناں پوسے۔ ملک اچ 70 لکھ نینگر منشیات دی لعنت دا شکار ہن،سکولاں دے ٻال وی ایندے عادی تھیندے پن۔اے ڳالھ انھاں سنوار کوں دورہ اینٹی نارکوٹکس (انسدادِ منشیات ) فورس دے ہیڈ کوارٹرز اچ تقریب توں خطاب کریندے ہوئیں آکھی اے ۔وزیراعظم آکھیے جو افغان جہاد دے بعد ملک اچ منشیات دی لعنت درآئی، ایں مسئلے کوں سنجیدگی نال نی ڳھدا ڳیا کیوں جو خیال اے ہئی جو ایندے نال پاکستان دا ضیان کائنی تھیندا پیا لیکن جیں چیز کوں قرآن برا آکھیے اومعاشرے کوں ضیان پڄیندی اے ۔ منشیات توں پیسہ بݨاوݨ آلیں کوں معاشرے وچ برا نہ سمجھیا ویندا ہئی او لوک قابل قبول ہن، اے بد قسمتی ہئی، ناجائز طریقے ، کرپشن اتے منشیات توں حاصل تھیوݨ آلے پیسے پاکستان کوں ضیان پڄائے ۔ اے پیسہ سیاست اتے کرپشن کوں ودھارا ݙیوݨ کیتے استعمال تھیا ۔ وزیراعظم آکھیے جو ملک اچ 70 لکھ نینگراں دا نشے دا عادی ہووݨ ٻہوں قابل تشویش ھے، اے اتنی وݙی تعداد دے جو نیوزی لینڈ اتے سنگا پور سودھے کئی ملکاں دی آبادی وی ایندے توں گھٹ اے ۔انھاں آکھیے جو گھر اچ جݙاں کوئی بندہ نشہ کرݨ لڳ ویندے تاں ایندی وجہ توں نہ صرف او بلکہ ایندا پورا گھراݨاں تباہ تھی ویندے ۔
