اسلام آباد۔24جنوری (اے پی پی):پا ک فوج دے سربراہ جنرل سید عاصم منیر آکھیے ساݙی فوج ہر قسم دے خطرے تے سازش دے خلاف ہر ویلھے تیار اے ، پاکستان اپݨی خود مختاری تے کوئی سمجھوتہ نہ کریسی ،دہشتگرداں دے خلاف تاں افواج پاکستان لڑسڳدی اے مگر دہشتگردی دے خلاف پوری قوم دا تعاون ضروری اے، سوشل میڈیا تے پروپیگنڈا دا مقصد بے یقینی، افرا تفری اتے مایوسی کھنڈاوݨ اے ، سوشل میڈیا دیاں خبراں دی تحقیق ٻہوں ضروری اے ، تحقیق اتے مثبت سوچ دے بغیر معاشرہ افراتفری دا شکار رہندے ۔ او ٻدھ کوں جناح کنونشن سینٹراسلام آباد اچ ”پاکستان نیشنل یوتھ کانفرنس“توں خطاب کریندے پئے ہن ۔ آرمی چیف سید عاصم منیر آکھیے ساݙے ملک دے نینگر ایں قوم تے ملک دی روشن روایات ، اقبال تے قائد دے خواباں دی تعبیر دے امین ہن، پاکستان دے مستقبل دے معماراں اتے اقبال دے شاہیناں توں مخاطب تھی تے خوشی محسوس کریندا پیاں ، پاکستان کوں بݨاوݨ دا مقصد اے ہئی جو ساݙا مذہب، تہذیب و تمدن ہر لحاظ نال ہندوواں توں مختلف اے نہ جو اساں مغربی تہذیب و تمدن کوں اپنا گھنوں، نینگراں کوں اپݨے وطن، قوم، ثقافت و تہذیب و تمدن اتے اپݨے آپ تے بے پناہ اعتماد ہووݨا چاہیدے ۔ انہاں آکھیے پاکستان دے نینگراں کوں ایں ڳالھ دا یقین ہووݨا چاہیدے جو او ھک عظیم وطن اتے قوم دے سپوت ہن۔ انہاں آکھیے سوشل میڈیا اتے پروپیگنڈا دا مقصد بے یقینی، افرا تفری اتے مایوسی کھنڈاوݨ اے ، تحقیق اتے مثبت سوچ دے بغیر معاشرہ افراتفری دا شکار رہندے ۔ انہاں قرآن مجید دا حوالہ ݙیندے ہوئیں آکھیے اللہ تعالی قرآن مجید اچ فرمیندن جو ؛”اے ایمان والو! جے کوئی فاسق تساں کنے کوئی خبر گھن تے آوے تاں ایندی تصدیق کرگھنو “۔ آرمی چیف آکھیے پاکستان دے قیام دی ریاست طیبہ نال مماثلت اے ݙوہیں کلمے دی بنیاد تے بݨئن ،اللہ تعالیٰ پاکستان کوں ٻہوں معدنی وسائل، زراعت اتے نینگراں افرادی قوت جیہی نعمتاں نال نوازیے ،مسلمان اوکھ اچ صبر تے سوکھ اچ اللہ دا شکر ادا کریندے ۔ انہاں آکھیے جو پاکستان دے روشن مستقبل تے کامل یقین تے اسلاف دی میراث کوں قائم رکھݨا اے ۔ طلباء خطاب دے دوران پاکستان آرمی زندہ باد ، پاکستان زندہ باد تے قائد اعظم زندہ باد دے نعرے وی لاتے۔
