اسلام آباد۔8جولائی (اے پی پی):وزیر اعظم عمران خان آکھیے جو موجودہ حکومت لمبی مدت دے منصوبے دے تحت آندیاں نسلاں کوں موسمیاتی تبدیلی تے عالمی حدت اچ ودھارے دے منفی اثرات توں محفوظ رکھݨ کیتے ماحول دوست روڈ میپ وضع کرݨ تے کم کریندی پئی اے ، ایں ضمن اچ ماحول دوست الیکٹرک موٹرسائیکل (ای بائیک )دا منصوبہ خوش آئند اے جیڑھا جو کلین اینڈ گرین پاکستان مہم دے سلسلے اچ حکومت دی الیکٹرک وہیکلز پالیسی دااہم جزو اے ،اساں ملک کوں ھک نواں رستہ ݙیسوں تے آندیاں نسلاں بارے سوچیسوں ،ماحولیات دے شعبہ دی بہتری اتے گلوبل وارمنگ دے حوالے نال پاکستان دے اقدامات کوں پہلی واری عالمی برادری منیندی پئی اے ،اللہ تعالیٰ پاکستان کوں ٻہوں سارے وسائل ݙتن ،موجودہ حکومت انہاں وسائل دے بہتر استعمال دی منصوبہ بندی کریندی پئی اے ۔وزیراعظم اے ڳال پاکستان دی پہلی ماحول دوست الیکٹرک موٹرسائیکل دی افتتاحی تقریب توں خطاب کریندے ہوئیں آکھی اے ۔وزیر اعظم آکھیے جو اے قدم مستقبل دی سوچ دے تحت چاتا ڳئے، جیڑھا جو الیکٹرک وہیکلز پالیسی کلین اینڈ گرین پاکستان مہم دا حصہ اے تے ایں پالیسی دے تحت ھک مضبوط الیکٹرک وہیکل دا ہدف مقرر کیتا ڳئے اتے ایندے تحت آٹو موبائل دی صنعت دی مرحلہ وار منتقلی کیتی ویسی ،الیکٹرک وہیکلز مینوفیکچررز کوں مراعات وی ݙتیاں ویندیاں پئن ،ماحول دوست پالیسی نال ملک اچ ہوا، پاݨی اتے شہراں کوں صاف رکھݨ اچ وی مدد ملسی ۔ وزیراعظم وفاقی وزیر حماد اظہر اتے خسرو بختیار کوں الیکٹرک وہیکلز پالیسی مرتب کرݨ تے وی مبارخ ݙتی اے انہاں اے پالیسی مرتب کرتے ملک دے مستقبل دے رستے دا تعین کیتے ۔انہاں آکھیے جو اڄ تئیں جتنے وی ملکاں ترقی کیتی اے انہاں ہمیشہ مستقبل دا سوچیے ۔وزیراعظم آکھیے جو چین دی ترقی دے پچھوں 10 ،20 اتے 30 سال دی منصوبہ بندی اے۔ انہاں آکھیے جے لمبی مدت پالیسی اختیار نہ کیتی ونڄے تاں ملک اچ الیکشن ٹو الیکشن فیصلے تھیندن جیں توں مافیاز فیدہ چاتے آپݨے مفاد اچ فیصلے کریندن تے ملک ترقی نی کریندا ، انہاں حضور نبی کریم ﷺدے فرمان دا حوالہ ݙیندے ہوئیں آکھیے جو ”اساکوں آندی زندگی کیتے اینویں جیوݨا چاہیدے جو اساں کل ہی ٹر ونڄݨا اے لیکن دنیا اچ رہݨ کیتے مستقبل دی منصوبہ بندی کرݨی چاہیدی اے”۔
