اسلام آباد۔20ستمبر (اے پی پی) آئی اے ای اے دے بورڈ آف گورنرز دے رکن دے طور پاکستان دا چݨاؤ توانائی دے پر امن استعال ودھاوݨ دے نال نال بین الاقوامی ادارے دے پالیسیاں اتے پروگراماں دی تشکیل اچ ایندے مثبت کردار کوں ودھاوݨ اتے ایندے اغراض تے مقاصد نال پاکستان دی پراݨی وابستگی دا اعتراف اے۔ اے ڳالھ جمعے کوں دفترخارجہ ولوں جاری بیان اچ کیتی ڳئی۔ بیان موجب پاکستان کوں ݙو سالہ مدت 2024 توں 2026 تک انٹرنیشنل اٹامک انرجی ایجنسی (آئی اے ای اے) دے بورڈ آف گورنرزدا رکن چݨیا ڳئے۔ ویانا اچ آئی اے ای اے دی جنرل کانفرنس دے 68 ویں اجلاس اچ مشرق وسطیٰ اتے جنوبی ایشیا توں پاکستان کوں ایں مہینے دے شروع توں شروع تھیوݨ آلی مدت کیتے اتفاق رائے نال چݨٰیا ڳئے۔ اے آئی اے ای اے دے بورڈ آف گورنرز تے پاکستان دی 21 ویں مدت اے۔ پاکستان دا چݨاؤ جوہری پاکستان دی جوہری توانائی دے پر امن استعمال دے فروغ نال جڑت دا اعتراف اے۔ پاکستان انٹرنیشنل اٹامک انرجی ایجنسی دا بانی رکن اے اتے ایجنسی نال جوہری توانائی دے پر امن استعمال تے دیرینہ اتے آپسی طور فائدہ مند تعاون کیتے۔ پاکستان انٹرنیشنل اٹامک انرجی ایجنسی دے ریز آف ہوپ اقدام دے تحت سینٹر فار کینسر کیئر دے علاوہ خوراک اتے زراعت، نیوکلیئر سیفٹی اینڈ سکیورٹی، واٹر ریسورس مینجمنٹ اتے جدید نیوکلیئر ٹیکنالوجی ایپلی کیشنز دے شعبیاں اچ چار مراکز چلیندے۔ ایں مہینے دے شروع اچ پاکستان کوں نیوکلیئر سیفٹی دے کنونشن (سی این ایس) دے ݙاہویں جائزہ اجلاس کیتے صدر وی چݨیا ڳئیا ہئی۔
