اسلام آباد ۔06 دسمبر (اے پی پی) وزیراعظم عمران خان آکھیا جو میرٹ دے فروغ سانگے نظام اتے اداریاں کوں مضبوط کرنڑ آلے ملکاں اتے معاشرے ترقی کریندن،نویں پاکستان اچ نویں سوچ دے نال میرٹ کوں ودھاونڑ،آن لائن سسٹم دے تحت قرضے ڈیونڑ،کاروبار اچ سوکھ ڈیونڑ،چھوٹے کاروبار اتے وچلی صنعت کوں ودھ توں ودھ سوکھ ڈیونڑ حکومت دی پہلی ترجیح اے، کامیاب جوان پروگرام 100 فیصد نینگراں سانگے اے،ایں دا فائدہ چھوٹے اتے وچلے درجے دی صنعتاں وی چیسن،سیاحت دی ہکو ذریعہ اے جیڑھا جو زرمبادلہ تکھے پاکستان گھن تے آسگدے۔اے گالھیں انہاں جمعے کوں اتھاں کامیاب جوان پروگرام دے تحت بیروزگار نینگراں کوں قرضے ڈیونڑ دی تقریب توں خطاب کریندیں ہوئیں آکھی۔ وزیراعظم عمران خان ملک دے مختلف جہیں توں کامیاب جوان پروگرام دے تحت قرضے گھنڑ اچ کامیاب تھیونڑ آلے نینگراں اتے تریمتیں اچ چیک ونڈیے۔انہاں آکھیا جو میڈی ایں پروگرام سانگے ترائے آبزرویشن ہن جو ایں پروگرام اچ شفافیت ہونڑی چاہیدی اے،نینگراں دے اعتماد تے پورا لہونڑاں چاہیدے اتے نینگراں کوں چھوٹے اتے وچلے درجے دے کاروبار شروع کرنڑ سانگے سوکھ ڈیونڑی چاہیدی اے۔ایں توں پہلے وزیراعظم عمران خان پروگرام دے تحت درخواستاں ڈیونڑ آلے کامیاب درخواست ڈیونڑ آلیاں وچ کاروباری مقاصد سانگے قرضے دے چیک ڈتے۔ ڈپٹی سپیکر قومی اسمبلی قاسم سوری، وفاقی وزیر منصوبہ بندی، ترقی تے اصلاحات اسد عمر، وفاقی وزیر بین الصوبائی رابطہ فہمیدہ مرزا، وزیراعظم دے معاون خصوصی برائے نوجوانان عثمان ڈار، وزیراعظم دی معاون خصوصی اطلاعات تے نشریات ڈاکٹر فردوس عاشق اعوان، سینٹ دی قائمہ کمیٹی اطلاعات تے نشریات سینیٹر فیصل جاوید، پنجاب اتے خیبرپختونخوا دے امور نوجوانان دے وزرائ، وفاقی کابینہ اتے پارلیمنٹ دے اراکین تقریب اچ شریک ہن۔
