اسلام آباد۔10دسمبر(اے پی پی)وزیر خارجہ بلاول بھٹو زرداری انسانی حقوق دے عالمی اصولاں اتے اقدار کوں برقرار رکھݨ دے اپݨے عزم کوںد وہریندے آکھیے جو پاکستان کوں ٻہوں کامیابیاں، تریمتیں کوں بااختیار ٻݨاوݨ، ٻالاں کوں حقوق، اظہار رائے دی آزادی اچ اڳونہی تے ماݨ اے، پاکستان فلسطین و جموں و کشمیر دے عوام دے حق خودارادیت دا پرزور حامی اے، عالمی برادری بھارت دے غیر قانونی مقبوضہ جموں و کشمیر دے لکاں تے جبر وانسانی حقوق دی خلاف ورزیاں مکاوݨ کیتے اڳو آوے۔ انسانی حقوق دے عالمی ݙینھ تے سنیہے اچ انہاں آکھیا جو اڄ اساں انسانی حقوق دے عالمی اعلامیہ دے 74 سال پورے تھیوݨ تے عالمی برادری دے نال ہیں، پاکستان اچ 1973 دا آئین ہر کہیں کیتے ہکو سویں حقوق اتے تحفظ دی ضمانت ݙیندے، اساں خواتین کوں بااختیار ٻݨاوݨ، ٻالاں دے حقوق اتے اظہار رائے دی آزادی اچ پیش رفت ݙکھائی اے، ساݙی آوݨ آلی نسل برابری، وقار اتے انسانی حقوق برقرار رکھݨ کیتے کردار ادا کیتے، ایں سانڳے پاکستان اقوام متحدہ دے نظریات اتے اعلامیہ کوں ودھاوݨ کیتے سارے عالمی اداریاں اتے کوششاں اچ پورا ہتھ ونݙائے۔ وزیر خارجہ آکھیا جو پاکستان عالمی انسانی حقوق دے ایجنڈے دی ترقی اچ اڳو اڳو اے، انسانی حقوق دے عالمی اعلامیہ و نسلی امتیاز مکاوݨ دے عالمی کنونشن دی ترقی اچ ہتھ ونݙاوݨ سودھا ویانا اچ انسانی حقوق بارے تاریخی بین الاقوامی کانفرنساں اتے بیجنگ کانفرنس تئیں اساں ودھ کردار ادا کیتے جیڑھا انسانی حقوق سانڳے ساݙے تکڑے عزم دا ثبوت اے۔
